د باره دفتر کمیشنر مالوماتی استرالی

دفتر کمیشنر مالوماتی استرالیا یا (OAIC) تنظیم کننده مستقل ملی بلده حریم خصوصی و آزادی مالومات استه.

مو از حقوق شیم بلده دسترسی به مالومات دولتی و محافظت از مالومات شخصی شیم ره ترویج و حمایت مونیم.

آزادی مالومات

قانون آزادی مالومات مصوبه 1982 استرالیا (FOI Act) بلده شیم یک حق قابل تطبیق قانونی میدیه تا بی تنید به اسناد شیم که د پیش حکومت استرالیا و سازمانا و وزیرای جزیره Norfolk استه حق دسترسی دیشته شید. شیمو می تنید ازی حق دسترسی بلده چک کیدون ازیکه مالومات شخصی شیم تکمیل و دقیق باشه، بلده فامیدون زیادتر د باره یک تصمیم دولتی، یا بلده شرکت کیدو د یک بحث د باره سیاست و مقررات دولتی استفاده کنید.

ای قانون آزادی مالومات سازمانای دولتی ره هم مکلف مونه که مالومات ره پخش کنن. نظر به طرح نشر مالومات، سازمانا باید مالوماتی ره که توضیح میدیه که اونا چی رقم ترتیب شدن و تصمیمایی ره که بله از شیمو تاثیر مونه چی رقم میگرن ره د وبسایت خو نشر کنن. سازمانا و وزیرا باید مالوماتی ره که د جواب به درخواستای آزادی مالومات(FOI) منتشر موشن د گزارش افشا منتشر کنن.

OAIC چی رقم می تینه شیموره کمک کنه

• تجدیدنظر: اگه شیمو قد یک تصمیمی که توسط یک سازمان د مطابق با قانون آزادی مالومات گرفته شده مخالف استید، می تنید ازی سازمان تقاضا کنید که د تصمیم خو تجدید نظر کنن. اگه جواب ای سازمان یا وزیر قناعت شیم ره حاصل نکده، می تنید از OAIC هم درخواست کنید که د ای تصمیم تجدیدنظر کنه.
• شکایت ها: اگه د باره نحوه اجرای درخواست تجدیدنظر خو یا هر اقدام دیگه که د مطابق قانون آزای مالومات گرفته شده کدم نگرانی دیرید، همچنین می تنید قد OAIC شکایت درج کنید.

حریم خصوصی

قانون حریم خصوصی مصوبه 1988 استرالیا از مالومات شخصی محافظت مونه. ای مالوماتی استه که شیموره شناسایی مونه یا شاید شناسایی کنه، از جمله نام، آدرس، سوابق طبی، جزئیات حساب بانکی، عکس ها و حتی مالومات د باره ازیکه چی چیزی ره دوست دیرید، مفکوره های شیم و جایی که کار مونید.

ای قانون حریم خصوصی جم آوری و مدیریت مالومات شخصی ره اداره مونه، به شمول استفاده و افشای شی، درستی شی، به چی اندازه به صورت ایمن نگهداری موشه و حقوق شیم د دسترسی د او مالومات.

ای قانون حریم خصوصی د بله حکومت استرالیا، سازمانای حکومتی جزیره Norfolk و سازمانای به خصوص سکتور خصوصی تطبیق موشه. باضی از استثناها هم قابل تطبیق استه، از جمله بلده کسب و کارای کوچک. ای قانون بله سازمانای حکومت ایالتی و قلمروها قابل تطبیق نیسته. د باره مدیریت شمارای دوسیه مالوماتی قانونای خاصی تطبیق موشه.

OAIC چی رقم می تینه شیموره کمک کنه

• شکایت ها: اگه فکر مونید که قد مالومات شخصی شیم کدم دخالتی صورت گرفته، باید اول قد خود سازمان یا نهاد شکایت کنید. اگه، بعد از 30 روز، کدم جوابی دریافت نکدید یا از جواب شی راضی نیستید، ازو باد می تنید د OAIC شکایت کنید. مو شکایت شیم ره مد نظر گرفته و شاید تلاش کنیم که از طریق مصالحه حل و فصل کنیم. نتیجای شی شاید شامل یک معزرت خواهی، یک تغییر د طریقه کار یا طرزالعمل یک سازمان، یک جبران خسارت بلده خساره مالی یا غیر-مالی شونه.

قد OAIC به تماس شید

اگه می خوایید به کدم سازمان یا وزیر دیگه حکومت استرالیا تماس بیگرید، لطفاً به فهرست راهنمایی حکومت استرالیا مراجعه کید.